زومبي!!

نتكلم عن الزومبي شوية، الزومبي مهضوم حقه يا جماعة...

طيب مبدئيا هتكلم بالعامية عشان حابّة الموضوع يبقى خفيف، ثانيًا مش هذكر تواريخ عشان ده مش مقال تاريخي قوي، هو أقرب لــ "حدوتة".
وأخيرًا هكلمك عن زومبي مختلف عن الزومبي اللي تعرفهم تماما.

الزومبي اللي تعرفهم عبارة عن أموات أحياء بيطلعوا من القبور عشان ياكلوا الأحياء... تمام.

جم منين؟

فكرة الزومبي ارتبطت في أصلها بسحر "الڤودو" وده حاجة في الثقافة الأفريقية، والزومبي في "الڤودو" عبارة عن جسد ميت الساحر بيتحكم فيه_ده اختصارًا يعني_، وطبعا الأفلام الأمريكية تفننت في إنها تعمل المفهوم اللي نعرفه عن الزومبي.

بس أنا مش جاية أكلمك عن ده صح؟

مش هنبعد عن أفريقيا واحنا بنتكلم عن "زومبي" بتاع حكايتنا اللي أنا فخورة بيه جدًا،
بس معلش عاوزاك تاخد بالك من إن  الزومبي اللي بياكل الناس اسمه "zombie"
وزومبي اللي بكلمك عنه اسمه "zumbi"  ومعرفش إذا كان في فرق بين الكلمتين في لغتهم الأصلية لأني معرفش أي لغة أفريقية بصراحة، لكن كتابتهم بالإنجليزية مختلفة.

عموما إحنا في أفريقيا دلوقتي والبرتغال ليها مستعمرات هناك، في بلاد زي الكونغو ومالي وكينيا، وأهل أفريقيا في الوقت ده كانوا مسلمين، أو قطاع كبير منهم كان مسلم، ماشي وبعدين؟

البرتغاليين اكتشفوا أمريكا، ومعدّاش وقت طويل والدول الاستعمارية بقى ليها مستعمرات في أمريكا، ومنهم البرتغال أكيد واللي كانت مستعمراتها في أمريكا الجنوبية.

والسيناريو معروف، الدول الاستعمارية قتلوا السكان الأصليين، وبعد كدة لما احتاجوا لأيدي عاملة في مزارعهم في الأرض الجديدة بدأوا "يخطفوا" ناس من مستعمراتهم التانية، ويستعبدوهم ويرموهم بعيد عن أهلهم وبلادهم في الأمريكتين، وتجارة العبيد كانت في أزهى عصورها وقتها.

وزي أي دولة استعمارية أصيلة، البرتغال مقصرتش في جلب سكان من مستعمراتها في أفريقيا، واستخدامهم كعبيد في مستعمراتها في أمريكا الجنوبية.

هنتحرك من أفريقيا مع الأفارقة اللي اتخطفوا منها عشان يتباعوا، تحديدًا هنروح "البرازيل"، ودي وقتها كانت واحدة من المستعمرات البرتغالية، وكان فيها عدد كبير من العبيد الأفارقة.
واللي مكانوش ساكتين للبرتغاليين كدة، بل قاموا بثورات كتيرة ضدهم، منها ثورات نجحت في إنها تعمل لنفسها كيان، وتؤرّق البرتغال بجلالة قدرها.

تعالَ أعرفك على واحدة منهم

 مملكة "بلماريس" ، دولة فعلا وليها حاكم وكلها من العبيد اللي ثاروا على البرتغاليين واتجمعوا في "غابة" وكونوا مملكتهم الخاصة، اللي فضلت تحارب البرتغاليين حتى مع فارق القدرة العسكرية، لكن قدرت تصمد لفترة.
حاكم بالماريس كان اسمه "جنجا زومبا"، ويقال إنه ليه صلة قرابة بملك الكونغو، وكان مسلم بالمناسبة زي ما قلتلك فوق عن الأفارقة.
جنجا زومبا قاوم البرتغاليين لفترة لا بأس بها، لحد ما طلبوا منه صلح!

الصلح كان قائم على وقف القتال والعفو عن العبيد الهاربين في "بالماريس" والاعتراف بيها كدولة، "جنجا زومبا" كان عاوز يوافق على الصلح لكن أتباعه موافقوش.

"البرتغاليين بيلعبوا علينا، مينفعش نآمنلهم" 
"إحنا لو ضمنا حريتنا مضمناش لباقي العبيد الثائرين في المناطق التانية، وللعبيد المضطهدين حريتهم".

في النهاية...

"جنجا زومبا" مات على ايدين اتباعه _اتسمم_ واللي حكم مكانه كان ابن أخته "زومبي" اللي كان من أول المعارضين للصلح، والمشككين في نوايا البرتغاليين. 

"زومبي" قرر يكمل النضال ضد البرتغاليين، لكن إحنا بنتكلم عن أسلحة بيضاء وبنادق مسروقة قصاد مدافع ثقيلة، فمهما القتال ممكن يطول كانت النتيجة محسومة للبرتغال. 

ومات القائد الأفريقي الشجاع "زومبي"، بعد ما البرتغاليين قضوا على جيشه، ونفوا اللي بقي من "بلماريس" للمستعمرات الشمالية، أو باعوهم لمناطق مختلفة عشان ميتجمعوش تاني.

ومثلوا بجثة "زومبي"، قطعوه بطريقة بشعة، وعلقوا راسه عشان يبقى عبرة لكل العبيد، ومحدش منهم يفكر يثور تاني.
مات وماتت قصته خلاص...

لكن مرت السنوات والبرازيل استقلت وبقت دولة قائمة بنفسها، وبعد فترة العبيد اتحرروا، وقررت الحكومة تعمل يوم قومي تحتفل بتحرير العبيد، الأفارقة البرازيلين اختاروا ان الاحتفال ميكونش في يوم إعلان التحرير، ولكن يكون في يوم وفات البطل "زومبي" اللي يعتبر أيقونة عند الأفارقة البرازيليين، وبطل قومي في البرازيل كلها.
 وده تمثاله.

تعرف قصته وصلتنا ازاي؟
من التقارير اللي دونها البرتغاليين نفسهم، وبعد استقلال البرازيل كل ده انكشف.